سبحانك الله يا عزيز الجلالي = يا من لكلن كافل ومتضمن
قلته وأنا فالحاير أو في حوالي = لكن هواجيسي هن اللي يخيلن
خيل سحاب الفكر غرب شمالي = فياض البكيريه عساهن يسيلن
متراكمن كنه سواد الليالي = كن الضحى بالليل الأسود مبطن
وكن البروق ملاعبين الحبالي = أو النجوم بليل غدرا تداون
من سمع رعاده يجيه اختلالي = أطواب حرب بالذخاير تراطن
صيده ذعر غشاه مثل الجفالي = وأحيان صياخ وجوم يتوحن
وتثولثنه مربيات الخيالي = ذولي يردنه وذولي يدزن
وترادف السحاب فوق الجبالي = ونامن على ظهر الجبل يوم ركبن
من المدينه للكويت متوالي = البرق يضحك والسحاب يتباكن
صب وعطا رب اسبوع كمالي = من جود من يعطي ويغني بلا من
ومعوج الوادي كلاه اعتدالي = شال وحفر جرفه وعدل وزين
وادي الرمه قال ابشروا يا عيالي = أنا لي أيام أبيهن يعودن
بعض النخل هو والشجر فالرمالي = على يمين ومن يسار نسفهن
وشين بحمله راح به ما يبالي = لأرامل من حملهن بي يخرفن
كنه يبا البصره يموم عدالي = هذي حراوي يمته كان لي ظن
قلبي يحب الخير لأهل الحلالي = ولا أرضى مضرة مسلم لو يضرن
راع النخل خير ووسيع بالي = ولا قصدته بس الأقدار يرمن
وصف أبا أقوله ولو كان تالي = لكن خلك للمعاني مفطن
صار الدلو والحوض والحبل غالي = رخص السمن واما العكك ما يطالن
تغلى القدور وينشرن الدلالي = وكل يبيهن عند بيته ينوخن
كرم الطبع ما هوب كرم احتيالي = يبي السمن والإقط كرم معه فن
وسلم على اللي يلحقون التوالي = يفرح بأهل عوص النضا يوم يلفن
ضوه إلى جاء الليل شبت تلالي = ونجره لربعه كل ما شب دندن
تم الشهر عقب المطر ذا الهلالي = اليوم أبا اّصف كيف الراس من البن
يا زينة الأوصاف بالله تعالي = ناديتهن ثم أقبلن يتغاضن
بالله وين دياركن يا حلالي = حنا زهور العشب من كننا ظن
غب الشهر حلالها بالمفالي = من العشب ذا ينفت وذا لي نفت ون
ورد الحلال حلول وقت الزوالي = يرعن شوي ولا يخلن يبطن
ونياقها شعاه مثل الهبالي = وصارن وثنات الركايب يهدرن
وعلى الروابي فرش مثل الزوالي = زهره وجنحان الفراش يتباهن
وطير أم سالم جالها فيه حالي = وقالت لعشاق الزهر مثلنا غن
قلته فابن عم علومه تقالي = له في المراجل ناصعات يقالن
قيدوم لا عدوا زحزل الرجالي = ينهض حجاجه لأرخم القوم طمن
ويجيب من أفوه الأفاع الريالي = يغذي دلال للنشامى يعدن
شمس المراجل له اشداد ظلالي = وإن كفنوا هو بالمدايح يكفن
له ناقة حمرا وطت كل خالي = خويه إما الذيب وإلا أبتع الجن
حمرا وأخذت اوصوفها من الغزالي = لولا اشداده والرسن كنها كن
حمرا وفيها من الجنيه أو تحالي = اسم الله عليها من عيون المشطن
كن القطا عمامها والخوالي = أو النعام إلى عطن مقفياتن
وينظم من الأمثال حلو اللالي= مثايلن في نجد ولنجد غنن
منها بيوت كالغدير الزلالي = موروثها بأغلى الثمن ما يباعن
هذا عبدالله كان عنه بتسالي = ابن خزيم كان عنه بتظنن
مع ذا بأوضح دقها والجلالي = شيخ من العزة إلى قيل من من
له لابة مثل النجوم التوالي = من تاه في مسراه له بيدلن
وأهل البكيريه يباس البلالي = ودك بهم لين أشهب الملح دخن
وجيرانهم كسابة للمعالي = وزنودهم من قدحة الجود سقن
سبيعهم واللي نزل عقب تالي = في ظل من عسى لياله يدومن
وذكر وصلاة عد ما نبت بالي = على النبي ولزاهر العشب يرعن