يا شيخ نجد معقل الراي تعقيل = يا محلحل اللي ما يحلحل عقاله
أبدأ بذكــر اللي عليه التساهـــــيل = ربٍ جزيــل الحمــد له والثنا لــــــه
مهلك جنود بريه بطيور أبابيـــــــل = حامي حمى بيته من أهل الجهاله
منزل هدى وحيه بقدرته تنزيــــــل = على الشفيع المصطفى للرسالـــه
مقدر الأقدار متبــع دجــــا الليــــل = نورٍ عن الأفاق يشعب رحــالــــــه
بعزته من عز بالديــــــن ما نيـــــل = وبآمره عسير الآمر تسمح عضاله
يالله بــك تفــتح صـــدورٍ مقافيـــــل = وعليك رجـــوى طالبك واتكاله
وبك أتعـوذ من خــنا الـــزل والميل = وباسمك أسمي يا عظيم الجلاله
وبذكرك بأبدى بدع جــــــزل التماثيل = اللي تلبي خاطري وتعــــــــناله
الشــــاردات النادرات المــذآييـــــل = لآسمٍ عليها مثل ختم الوكاله
حقي عليها سبي لـب المـــــذاهيــل = بحبكٍ وسبك وغزر جم وجزاله
واللي لها أني ما أتعــــــدا ولا آميـــل = ولا أرخص ثمنها في دروب الرزاله
ولا أبدي سناها في الوجيه المهاشيل = إلا على وجيه النقا والشكاله
ما هو كـــلام مبهرجــــين الهزازيــــل = اللي نباها يعيب من هو دناله
سلام يا شيخ الوفا وافـــــي الكــــــيل = سلام من ذكره ترزم خياله
سـلامٍ أحــلى من قــــراح الهمالــيل = وألذ وأنقى من منزل زلاله
ينساق لك مع ريحة المسك والهيـــل = ومن غالي الكمبود يندا مقاله
يا من كتب باسمه وطيب الأفاعـــــيل = خمسين عامٍ من سعد نجد وآله
يا شيخ نجد معــقل الــــرأى تعقــــــيل = يا محلحل اللي ما يحلحل عقاله
يا نســـل من تبرك جـــــزال التماثـــيل = من دون حقه كل ما جاء مجاله
عبدالعزيز اللي سنـــا أمجاده اتهــــيل = اللي عشق له منزلٍ وارتقاله
ذيب السرايا متعب الجيـــش والخيل = اللي عسف رآس المحال وسماله
حتى تعدا هامـــة الجـــدى وسهــــيل = وأصبح على الطولات يضرب مثاله
بالله ثـــم بــعـــزم يهــــد المــــعازيل = وبصلب باس وطيب راس وبساله
وحد أبلجٍ عند اللقاء يرعــب العـــيل = ويأمن بحد مهنده من صفاله
وصفوة زحولٍ تعدل الميل تعديـــــــل = أهل الوفا وأهل الظفر والأصاله
حتى أذعنت عقب الشقاء والتـهاويل = وركز عمود الدين والظلم زاله
وبان العدل وأجلا عتم ظلمة الليــــل = من حد جال الدار لحــد جـــــاله
وإنا سيوفٍ لــــــه تجـــــز العــــيايل = وإنا عصا معزي على من عصاله
وهاذي عوايــــــدنا وللوقت تدلــــيل = من عهد جدانه ملوك الجزاله
من عهد أبو فيصل سعوط المهابيل = اللي بالأجرب زال ليل الظلاله
وإنا على عهد المعزه معــــــــاديل = والحمل ما تثنى له إلا جماله
ويوم أبتدى معزي صعيب الأسابيل = وإنا على يمناه وإلا شماله
وإنا سناده والمواقف مدالــــــــيل = وإنا رماح الشيخ في كل قاله
كم واحدٍ منآ معه بأول الخـــــــيل = أقـدم وجزن المنايا حباله
وكم مرةٍ شانت وجيه المخاليل = في موقفٍ من طاح محدٍ عباله
في موقفٍ يخلف زحول الرياجيل = يفرق به القائد معادن رجاله
فرت به امهار النشاما مجافيل = من حر ضربٍ ما يوصف نكاله
وثنى صليب الرآى مروي المساليل = فراج فراج الوفا والشكاله
من دون زيزوم الظفر عادل الميل = صل العبيه ومهدي الموت حاله
ولمثل أبو تركي تداس المناكيل = ويسخي عريب الجد حاله وماله
عز الرفيق ومسنده في الغرابيل = لا من لقاء فالوقت ما حس باله
له فزعةٍ تشفي كبودٍ مغالـــــيل = من طولها تسمى على كل طاله
مثل العريق وغاية القصد تمثيل = واللي سواته ما تعدد فعــــــاله
لعل جنات النــــعيم المظالـــــيل = دارٍ لهم واللي بدربه وفـــاله
يا أبو فهد هذاك جيلٍ وذا جيل = يطرب له اللي حاضره سم حاله
صحيح من قال الليالي مداويل = وأن المعالي في الليالي دواله
واليوم أمان وزود خيرٍ وتسهيل = من نعمة اللي ما تعدد فضاله
لكن عسى قافٍ حروفه شهاليل = يبرد لضى قلبٍ يزيد اشتعاله
وش حيلة اللي له بالأطلال تعليل = إلا أن ينعى بالقلم ما مضاله
ما دام ما في الواقع المر تعويل = عل الحشا يسلى بشيٍ قضاله
يا كم رجينا إنصافنا من المقابيل = وعيا علينا ميلها باعتدالـــه
نشكي عنا وقتٍ همومه مجاديل = والهم بأعقابه من أول قباله
وقتٍ حرم سرحان روس المقاذيل = وعداه عن مبداه وأبدا بداله
من عقب ماله فالطويله مداهيل = قامت تصاوى في نباها الثعاله
وقتٍ يدني الرأس ويعلي الذيل = حتى استوت رؤس العرب والحثاله
ولا شحنا منه ثقل المحاميل = أوضعف وإلا قل حـــيل وعطــــاله
الحمد لله ما يدينا بمشاليل = من فضل ربٍ يمن اللي لجـــــاله
الدين نشتاله على الدين ونشيل = حملٍ على الخايب دروبه محاله
منا الولد لو هو مورآ من الويل = يستر مواجيب العرب من حلاله
ومشرعٍ بابه وصفر المعاميل = على طرف سمرٍ تواقد شعاله
في مجلسٍ لكرام الأنفس مداهيل = والطيب له بأقصى ركونه نزاله
عقب كرامة داهله بأجزل الحيل = للعود الأزرق فيه صاله وجاله
مدهل نقا يكرم عن القال والقيل = راعي النمايم مقعده ما هناله
ونجود لا شحت يدينٍ مغالـــيل = إليا التوى ولد الردي في رياله
ولو إن حدانا من زحام الغرابيل = ما هوب يلقى يعشي عياله
بخير حال ٍ والضماير مساديل = أقرب ربوعه لو نشد ما شكاله
على ثقل حمله يراها تساهيل = وبكسبة الناموس طيب وداله
يا أبو فهد ما في عنا الوقت تمهيل = وما قدر الوالي على العبد طاله
وقتٍ غداله فالعرب حط وتشيل = وراع الصحيح أصبح على الناس عاله
وقتٍ قُلب صدقه بكيل المكاييل = ولاحت تعاجيبه وبــان اختلالــــــه
من يوم قصرن اليدين المخاطيل = وكلٍ على يمناه عقلت شماله
من عقب هيبتنا تهز الرياجيل = عدي على المرقاب من لا استواله
ومن عقب منآ للمعزه مناهيل = ويذري ذرانا بالوفا من لجاله
وتآمن بنا الأقصين قبل المقابيل = جاء طق واحدنا على رآس ماله
لا نمن الخايف ولا نزبن دخيل = ولا لنا قسمٍ مع أهل الجزاله
يدوم فضل أهل اليدين المفاضيل = يا وقتنا اللي ما عرفنا اعتداله
والحمدلله ما خفن التعاليل = وكلٍ على علياه تشهد فعاله
ومهيب تنقصنا بعين الرياجيل = العلــم بين وقتنا ما خــــفالـــه
إنا هل الطولة زبون الأجازيل = والنفس ما نرضى لها بالرذاله
وزومان أبوعضودٍ من أول مفاتيل = وإليا ارتكى لمعجز الحمل شاله
العام يبرك لا أثقل الحمل ويشيل = حملٍ على غيره يفوق احتمالــه
واليوم لعل وعسى كان به حيل = عله يقوم بحمل عمره لحالـــه
يا شيخ يوم إنها بحد المصاقيل = وكـــلٍ وحقــــه ما بيمناه ناله
إنا هل العليا الكرام المباجيل = وأهل الظفر وأهل الفعول الجلاله
لنا السنام اللي عليه الأداليل = في كل ( غلبا ) محتمينٍ سباله
حقٍ لنا وأكبر أجل المحاصيل = ( حدر وعلا ) والصدق ينجي مقاله
ولنا الثلاث البيض حقٍ وتاصيل = علمٍ عليه شهود فعل ودلاله
حقٍ على ( الغلبا ) توفي له الكيل = من تبع وجنانا لنا آدي كياله
قسمٍ لنا يا مدورين التآويل = يمشي على الرآضي ومن لا رضاله
قسمٍ لنا يعجز زحول الحلاحيل = ما غيرنا شدادٍ على نجـــد طــــــــاله
مجدٍ توارثناه جيل ورا جيل = وسلالة توارثه مـــن ســـلالـــــه
دونه نبيع أعمارنا له مشاهيل = ونموت دونه والعزى في البقى له
ما هيب شيخة مال وإلآ دهاويل = الهرج واجد والقوايم هزاله
ويوم الردي عند اللقاء عزمه اخبيل = وعند السعه هرجه يكسر جباله
فإنا بنا ترجح ثقال المكاييل = ومنا حزامه فالقاء طاب فاله
ولأنا على جرح الرفاقه معاجيل = الصاحب إليا أخطى رفينا خماله
إلآ خطا من زود ما به تماهيل = أترك غلامٍ ماكره ما احتماله
للعز رؤس وللعــداله مناهيــل = وإليا بلــينا ما نعـــرف العداله
نجهل بجهلٍ فوق جهل الجواهيل = ونورد الجهال نار الجهالــــــه
والدار ما جينا حماها عمامــيل = ولا نزلــنا حدهـــا بالـــــكفاله
حنا هل الدآر وذرآها عن الميل = يومٍ كــــل يمتلـــك ما حمـــــاله
كم حاكمٍ من دونها في اللقاء زيل = بأيمانا يومه قضى الله زواله
دوك السبيه للحقايق تداليل = ما هي لفايق ربع لاله يالاله
يوم الإمام أرسل وفود المراسيل = ولبى ضويحي والسعد في رحاله
ونوه على المحدار زبن الحلاحيل = واهتز عرق سبيع مما نواله
حول بربعه لآد عامر محاويل = لو عاد حربه ما تطفت شعاله
خمسة عشر عامٍ سنا نارها يهيل = شريف مكه مرقده ما هناله
وجينا على العجلات ركض وزرافيل = وقبل المجي والعلم ما به نفاله
أربع شهورٍ والرفاقه ذواهيل = وابن عريعر طايلٍ في مطاله
وبتلا نهارٍ به وصلنا له الليل = عضناه في قبرٍ تهايل هياله
هاذي عوايدنا بنا يرجح الكيل = وإنا حراز العز في كل قاله
ويغنيك عن كثر الحكي والتفاصيل = فعلٍ عليه من الشواهد دلاله
لا شان علم ملفقين الأقاويـــل = اللي حداهم ما يوثق مقاله
والكذب ليل والحقايق قناديل = والزور لو يتلا قصارٍ حباله
وإن غرتك فينا هل القال والقال = وطاوعت فينا ملفقين الخماله
فإنا على العهد المسمى معاديل = يا شيخ نجد اللي يذري ظلاله
وإن كنت فينا قانعٍ بالمباديل = فإنا وفاكم ما نبدل بدالـــــــــه
على الوفا نبقى ولا نعرف الميل = والحمل ما تثنى له إلآ جمـــاله
لكن إليا وصلت بنا ذا المواصيل = فلا هان قدر سواتنا وش بقى له
رآس المعزه ما لنا فيه تبديل = لا عاض ولد اللآش فالعز ماله
وإنا على طبع المعزه مجابيل = والرزق عن اللي عظيمٍ جلاله
ومناب من يرضى طمان المنازيل = الحر يجزع عن دروب الرزاله
ما قلتها أبغى من ورآها محاصيل = جودك وفضلك مرتوينٍ زلالـــه
نطق الحقايق في زمان الدهاويل = تكفي عزيزٍ عزته رآس مالــــه
هذا كلام اللي يعسف التماثيل = اللي خطر باله كلامٍ وقـــــــاله
وأنا وريث معنية حرك الخيل = أهل السطر وأهل الظفر والشكاله
من لابةٍ عند الملاقا حلاحيل = رجالهم ينطـــــح لو إنه لحالــــــه