مسلم وخطة 4 -4 -2

بسم الله الرحمن الرحيم ... وبه نستعين ،،

ملاحظة على الهامش : "ناصح" هو شخصية خيالية هتصاحب "مسلم" في رحلته في "صحح صيامك"

"ناصح" شخصية تظهر في عقل "مسلم" فقط

"مسلم" فقط يستطيع رؤية "ناصح" والإستماع والتحدث إليه


فتاااااااااابعوا الناصح المسكين ،،



مسلم وخطة 4-4-2

ناصح : سمعت عن خطة 4-4-2

مسلم: نعم!! نعم!! أنت هتهزر ... إبعد عنى مش وقته هزارك ها

ناصح: مين قال أني بهزر .... دي عبارة عن خطة لرمضان
رمضان اللي ربنا قال عليه {شَهْرُ رَمَضَانَ الَّذِي أُنْزِلَ فِيهِ الْقُرْآَنُ هُدًى لِلنَّاسِ وَبَيِّنَاتٍ مِنَ الْهُدَى وَالْفُرْقَانِ }[البقرة:185]

مش رمضان بتاعك أنت
!!

مسلم: وفيه أيه رمضان بتاعي بقى يا عم ناصح ؟!

ناصح: فيه أنه ملوش علاقة برمضان يا أخ مسلم ( بيني وبينك أنا شفت كلامك مع المذيعة)
المهم اسمع بقى الخطة وركز معايا يا صاحبي

مسلم: هااااا سمّعنا !!

ناصح : بص ياسيدى 4-4-2 دى يعنى :-

اربع حاجات لازم نعملها قبل رمضان
واربعه تانيين لازم تعملها فى رمضان
واتنين بعد رمضان كده وعليك خير

يلاااا صلى على حبيبك النبي صلى الله عليه وآله وسلم

مسلم: صلى الله عليه وسلم
هااااا وبعدين ؟



ناصح: خلينا بقى في الأربعة اللى قبل رمضان .... وهم:-
(1) التوبة
(2) تصحيح الآفات والمشاكل اللي بنقع فيها في رمضان.
(3) معرفة فضائل شهر رمضان
(4) التدرج في الطاعات وإعداد خطة للشهر الكريم.

مسلم: وأنا أيه علاقتي بالقصة دي ؟!؟

ناصح: علاقتك إنك صاحبي وإني عاوز لك الجنة
كل واحد مننا عنده ذنوب ومعاصي
وكل واحد بعيد عن ربنا مش مرتاح وتعبان ونفسه يقرب منه
وأنت محتاج تتغير ... ومحتاج تبدأ صفحة جديدة مع الله
بالله عليكِ أنت رايح على فين ؟

مسلم : مش عارف
مش عارف ... يعني هي د نيا ومقضينها والسلام



ناصح: كلنا لازم نعرف احنا رايحين على فين؟
سواء الأخ الشيخ الملتحي
واللى عنده شوية ذ نوب صغيرة
واللى مقضي حياته كلها اغاني ونت وإباحيات
واللى أكتر واللى أقل

كلنا محتاجين نرجع لربنا ونقرّب منه

ربنا بينادينا

تخيّل كده ولله المثل الأعلى لو أنا ذاهب إليك وبمد لك يدي وأقول لك مش عايز حاجة؟..... وأنت معرض عني لا لا مش عايز حاجة...... وأنا أقولك اطلب أي حاجه ...؟ اسأل عن أي حاجه وأنت معرض !!
فربنا سبحانة وتعالى كل ليلة يناديك ويقولك " هل من داعٍ فأستجيب له"

مسلم: مش عارف أقولك أيه ؟!

ناصح: قولي من جواك وبمنتهى الصراحة والوضوح .. أنت مرتاح البال؟ ..حاسس بطعم السعادة؟
مفيش مرة حسيت إنك مخنوق ومُكتئب وقرفان من الدنيا وعايش الدنيا بالطول وبالعرض واهى متقضية وخلاص؟ مفيش مرة حسيت إنك عايز تعيط .. تترمي في صدر حنين ..تحط راسك عليه و تشعر بالأمان والحنان؟
حاسس أن فى بينك وبين ربنا ذنب خايف تقابله بيه؟ ..فى بينك وبين ربنا سد نفسك يتهد؟ ..بتضعف قدام شهوات نفسك؟ عشان كدة بتغلبك على المعاصي ..؟؟
أنا عايز اسألك ..وجاوبنى من جوة قلبك
هل احنا عايزين ربنا ؟؟ احنا بنحب ربنا ... ؟؟ يعني نفسك تتوووووووب ؟؟
ولا شايف أنك كده تمام ومفيش أي مشاكل ؟؟

مسلم: آآآه ... بجد نفسي أحس بطعم الراحه
نفسي أقرب من ربنا ... نفسي أتغيّر وحياتي تبقى لها معنى وهدف
أنا بجد بحبه أووي ونفسي أتوووب

ناصح: النبي صلى الله عليه وسلم يقول : " إن الله عز وجل يبسط يده بالليل ليتوب مسيء النهار ويبسط يده بالنهار ليتوب مسيء الليل حتى تطلع الشمس من مغربها " [صحيح مسلم]

ربنا كريم أوي وجميل أوي ... ربنا غفور رحيم

بس أنت ارفع يدك وقل : " اللهم اغفر لي وتب عليّ إنك أنت التوّاب الرحيم "

وقال رسول الله صلى الله عليه وسلم : " قال ربكم عز وجل إذا تقرب العبد مني شبرا تقربت إليه ذراعا وإذا تقرب مني ذراعا تقربت إليه باعا، وإذا أتاني يمشي أتيته هرولة " [مسند أحمد]



"مسلم" نفسه يتوب ... وعنده الآن رغبة صادقة للتغيير
وأنت ... متى ستعود؟

قال جل وعلا في الحديث القدسي : " يابن آدم إنك ما دعوتنى ورجوتنى غفرت لك ماكان منك ولا أبالى يابن آدم لو بلغت ذنوبك عنان السماء ثم استغفرتنى غفرت لك ولا أبالى يابن آدم لو أتيتنى بقراب الأرض خطايا ثم لقيتنى لا تشرك بى شيئا لأتيتك بقرابها مغفرة " رواه الترمذي



إنتظرونا الحلقة القادمة
و "مسلم" ومعادلة التغيـيــر