يا خوي لـك عنـدي وصـاة مصيبـه = خذلك وصـاة تلمـس العقـل وتصيـب
تـرى وصـاة أخـوك ما بـه معيـبـه = لا صار أخوك مكمـل العقـل ومنيـب
أخـاف أمـوت ولا ضـلال تجيـبـه = توزي لضيقـات الـدروب الضنابيـب
حيـث الليالـي مــا تعـلـم بغيـبـه = ولا يعلـم إلا صاحـب العلـم والغيـب
ودي تحـرص عـن بـلاد كـويبـه = ويصير بـك عـرف وكمـال وتأديـب
وإلا المقـدر صـار مــا ينحكيـبـه = ولا ينمحـي هـذا مـن الله مكاتـيـب
افهـم وصاتـي كـان قلبـك يصيـبـه = تطلعك مـن كـل الأمـور الحراديـب
أول وصاتـي بالـفـروض الأديـبـه = صـوم وصـلاة وعدهـم بالمواجيـب
وثانـي وصاتـي للأمـور الصعيـبـه = احرص عليهـا قبـل هـون وتصعيـب
جـر عبيلـه مـا يكـلـف طبيـبـه = ولا شـيء إلا ماضي (ن) لـه تجـاريـب
وثالـث وصاتـي تلعـة ينعـدى بــه =تلقـى عليـهـا بيـنـات المسـاريـب
واللي عدابة ذيـب مـن بطـن ذيبـه = ولا واحد عدى بهـا غيـر هـو ذيـب
ترى هذاك العـرف مـن غيـر ريبـه = راعيـه لا يطلـب ولا لـه مطالـيـب
ورابع وصاتـي كثـرة الهـرج خيبـه = هـرج بـلا معنـاه مسمـوج ويخيـب
لا صـار مـا عنـدك علـوم غريـبـه = بيـن الرجـال ترتـب الهـرج ترتيـب
وخامس وصاتي خفـة الرجـل عيبـه = من راكض الفرقان يركض لـه العيـب
لا صـار مـا تنحـر لـزوم تجيـبـه = تنحر غرضك إن كان ما جـاك وتجيـب
وسادس وصاتـي لـك معـزة وهيبـه = عليك بسفـن البـر حـرش العراقيـب
ولا يعجبـك الزبـد هـو والرويـبـه = ترغب لحوش الضـان وتخلـي النيـب
راعي الغنـم يشيـب مـن قبـل شيبـه =والبـل معـزه تجلـي الهـم والشيـب
إلى اشهلـب الوقـت لـو هـو حليبـه = يوصلـك لديـار الهنـاء والتعاجـيـب
وسابع وصاتـي كان صابتـك سيبـه = تقـدر علـى كثـر الثمـن والمطاليـب
بنـت الحمولـة والأصيـل العريـبـه = اللـي قناهـن ذاق لــذة وترغـيـب
واللـي قنـا بنـت الـردي والهليـبـه=أصبـح بهـم وجنـب الربـح تجنيـب
والعجـز يـرث لـك مذلـه وخيـبـه=أردى الرجـال اللـي يذمونـه السيـب
عليـك بالسقمـة ولـو هـي تعيـبـه=مـا دام بـك حيـل تنـط المراقـيـب
تـرى كثيـر المـال كـل (ن) حبيـبـه=ويقال له فت جاي لـو ما فعـل طيـب
وإلا قليـل الـمـال شـن (ن) ارويـبـه=لو كـان طيـب يكثـر (ن) بـه عذاريـب
وثامـن وصاتـي شرهـا ينحـري بـه=ترى الدروب الفاسـدة مـا بهـا طيـب
درب الـزنـا والعـايـزة والقريـبـه=احـذر هذيلـن مـن كبـار العذاريـب
ثنتين مـن داخـى عليهـم احكـي بـه=مداخي علـى وجهـه تعيبـه معاييـب
مداخي على عرضه مثـل شـق جيبـه=علـم يبـيـن مــن أذان الأعـاريـب
وتاسع وصاتـي عـن مناقـر شريبـه=إلى صار ما هو من وسـاع المشاريـب
خـلـه ويلـقـى بالـمـوارد لعيـبـه=عنـد الظوامـي يكثـرون الوعاعـيـب
ومـن دور العيـلات غربـل نصيـبـه=احسب حسابه مـن حسـاب المذاهيـب
ومـن جنّـب الشيطـان حقـه غديبـه=ومن هاب طبات الملاعـيب مـا هيـب
عـن واحـد يبـلاك أو تبتـلـي بــه=ينهـج حديكـم يــم دار الأجانـيـب
وعاشر وصاتي إلى صـارت مصيبـه=وبـلاك ربـك وابتلـوك المغاضـيـب
احـذر تمضـي مـا تسمـى غليـبـه=امض وتبيـن عـن إلحـاق المشاعيـب
وازبن على حصـن الرجـال الصليبـه=عـدك بعيطـا عـن سمـوم اللواهيـب
ومن غيرهـا عنـدي وصايـا عجيبـه=لا فكـر الفاهـم يصـيـب المتـاريـب
والكـل منهـن يـوم تفطـن صعيـبـه=والكـل منهـن يلحقـنـك مشاعـيـب
الضيـف ضيـف الله وصابـه حبيبـه=استقبل ضيفـك فـي تهـل ٍ وترحيـب
قلـط لـه الميسـور وما هـان جيـبـه=واحلف على الماجود ديـن المعازيـب
وخويـك اللـي بالخـلا تبتلـي بــه=خيـال وإلا فـوق عـوج المصالـيـب
أو راجـل (ن) حفـيـان مـالـه نجيـبـه=أو عـورة يبلـي بهـا عالـم الغـيـب
اصبر وراعي الصبـر محمـود طيبـه=عنـد الـذي يبـي الفخـر والمراتيـب
وقصيـرك اللـي ما يصيبـك يصيـبـه=وصابـه الله لا تحسـف بــه الطـيـب
حقـه عليـك تـزود الـقـدر هيـبـه=إلى ما يروح بـزود حشمـة وتوجيـب
وراعي الجدى حـق الـردى ما يصيبـه=ومن لا عرض جنبه على الطعن ما صيب
الشيـوخ والحـكـام زمــل منيـبـه=فيهـم عمـار وقضـي لازم وتخريـب
مـا ينومـن مـن شـأن منهـم حليبـه=عقـب الصداقـة ينقلـب كنـه الذيـب
أهـل خفايـا وغيبهـم مـا دري بــه=يتحدرجـون بـدون عــذر وتذنـيـب
عشرانهـم هــل العـلـوم العجيـبـه=وصدقانهـم مرويـن حـد المغالـيـب
إلى صـار مـا حـدا الثلاثـة تجيبـه=مالك بهـم والـدرب شـرق وتغريـب
خويهـم مـا يشتهـي نفـض جيـبـه=حكـاي وجهيـن يـقـص العراقـيـب
هــذي يـودهـا وهــذي يجيـبـه=وهـذي يسويهـا بصـدق ٍ وتكـذيـب
واللي حكي بيـن الصحيـب وصحيبـه=مخرب ويخرب بين نـاسٍ (ن) وأصاحيـب
وسوالـفـه دايــم نميـمـة وغيـبـه=ولا يستحي من كلمة الكـذب والعيـب
راعـي النقيلـي لا تــوارد قليـبـه=امـوارده مـا يبهـج القلـب ويثـيـب
هـذاك لا تـنـزل جـوانـب شعيـبـه=بالك تحطـه يا أبـو زعـزوع بالجيـب