الناس تفنى والمباني والأملاك= والقول يبقى والخبر للتوالي
الشعر معنى حكمته بعد الإدراك= وما كل ما يلمع على النور غالي
والشعر صور شاعر فيه تلقاك= إما لبس لك جوخ وإلا سمالي

يا طارد اللي راح خله وملواه = ما يستقيم الظل لاعوج عـــوده
ولا ينفع الندمان قولة حلولاه = جحر لدغ يمناك لا لا تعــــــــوده
مد النظر في خلق ربي تمعناه = إلى انتقص من حال حالٍ يزوده
الله جعل للمبتلى داه ودواه =وكلٍ على عزمات قلبه حــدوده

احفظ دبشك اللي عن الناس يغنيك= اللي إلى بان الخلل فيك يرفاك
اجعل دروب المرجله من معانيك= واحذر تمايل عن درجها بمرقاك
أدب ولدك إن كان تبغيه يشفيك= واستسفعه من بعد مرباه يالاك

وربعك إلى بان الخلل فيك عافوك= أقرب قريب لك من الناس يشناك
إن كثر مالك اصدقوا لك وطاعوك= وإن قل ما بيديك شانت حلاياك
لو تطلب الماء عندهم كان ما أسقوك= أبعد مزارك عن وطنهم ومرباك
وإن طاب حظك اصدقوا لك وحبوك= وإن بار كل ما يبي غير فرقاك
وهراجة المجلس إلى جيت وروك= منازل تطرب نظريك بدنياك
وإلى قضوا منك اللوازم وخلوك= تفرقوا وأنت احتمل لكل ما جاك
كنك سراج البيت للنور شبوك= واللي انقضى اللازم حد الربع طفاك

واصحى لخلان الرخا لو تغالوك= اعرف ترى أطيبهم إلى احتجت يجفاك
كنك خوي مقيط دهووك وأغووك= وحقك عطاك رشاك وأقفى وخلاك
واحذر عن العيلة ترى الحق مدروك= مثل العمل يدركك ما منه فكاك
وإن كان عدوانك على الضيق حدوك= فاخصم طلابتهم بعجفاك وقداك
وإن كان هم لمشرف الحق ما شوك= ناظر مطاليع الفرج قبل مبداك
واحلم على الجاهل ترى الحلم مبروك= وقم للضعيف اللي من الضيم ينخاك
وادمح خطا جيران بيتك إلى أوذوك= ترى القصير وحرمة الجار بحماك
وقم للضيوف اللي لفولك وضافوك= أغلى كرامتهم حجاجك وبشراك

ساس الردي لا بد مبناه ينهال= ولد الردي اصحى تحطه بطانه
تلقاه وقت الضيق لا ضكك الجال= الصفر لا يغريك زين لمعانه
ترى الذهب من صافي جنيه وريال= ما يختلف يا ذيب طيلة زمانه
بستان غيرك لو به ألوان وأشكال= ما تنتفع من خوخه وبردقانه
ما ينفعك ما فيه لو بالثمر مال= لا صار بالغدراء جداره مخانه

احرص عن الزلات في كل الأحوال= لا تنخدع باللي يعلج اللبانه
ما يفتري ويشين الناس رجال= راع الحكي بالناس خله وشانه
عليك باللي بالمهمات سردال= ليث مثل من حط قوسه رهانه
أنت وأنا نبعد عن القيل والقال= كم واحدٍ يا ذيب ضره لسانه

الرفقه اللي مالها ساس ووصول= أتلى تلياها تروح بسهوله
مثل الذرور اللي على راس غرمول= أول مهب يعترض له يزوله
والفعل ما يطلع على مستوى القول= يقول قول ما يطبق فعوله
والفرق في الافعال ما هوب في الزول= وإلا ترى أطيب ما من الثور زوله
لو غرّهم زوله وحطوه مسئول= صاروا مثل راع الغنم ومخيوله
ثوب على جسم على شبه مخيول= ودايعه يفرسهن الذيب حوله

بعض البشر مثل النجوم المراهيش= أنوارهم تزهي بالأفراح بشه
أفكارهم ري العقول المعاطيش= في الدين والدنيا للأخيار هشه
وبعض البشر عقله من التبن والخيش= لو زان شكله داخل الراس عشه

ترك عشير عشرته يوم أو دون= ثم يبدل بك عشير وينساك
شف لك قطامي على السد مامون= درع القفا ما ينهض الراس لحذاك
اللي إلى أوحى الناس فيكم يهرجون= حامى على عرضك ويدمح خطياك

الشور ما ينفع قلوب المهابيل= كالزند وإن حرك تطاير شراره
لو تأمره بالعدل يعرض على الميل= يبتل على رايه بربح وخساره
والطبع ما ينزال غيره بتبديل= مثل الجدي مرساه ليله نهاره
والحنظله لوهي على شاطي النيل= زادت مرارتها القديمه مرارة

لا تستشير إلا صديق يودك= في الله صافي السر مامون عاقبه
وترى شور ما لا يستشيرونه الملا= شمعه نهار في ضيا الشمس ذايبه
وأرى النصايح في البرايا فضايح= وكم ناصح أضحى له الناس عايبه

تكلفك بأمر ما يخصك جهالة= وتبعدك عما كان يلزمك له قافي
ولا تصافي كود حيد صميدع= غيور على الصاحب نصوح وميلافي
ولا تلوم النفس في جاري القضاء= ما لك عن المقسوم يالعبد كافي
باشر هل المعروف منك بتواضع= وأهل الشر باشرهم بشر وتستافي

ما طار وقع من مطيره ولو حام= والزود مثل النقص ينقص ولو زاد
دنيا تغر الناس في طول الأحلام= ولا بد تاصل شرها بين الأجواد
يا ماشي بالدرب مسرى ومجهام= لا بد من عقب المراويح معواد
أحد قضى زامه وأحد يمسك الزام= واللي صدر منها يجي غيره أوراد

من رابع الخايب سكن دوم وإياه= لبس الدناسه عقب لبس الجدادي
ومن طاوع الشيطان في دينه أغواه= يصبح غريق بين الأمواج غادي
ومن عاشر الطيب ترى الطيب شرواه= وبالطيب يرقى نايفات المبادي
خلك مع الطيب وممشاك ممشاه= ورافق على الربع القروم العوادي
عز الفتى دينه وسلمه ومرباه= وربعه عضوده عند قدح الزنادي
تاقف معه وبقدر الإمكان تحماه= لا صار بأطراف الحبال انعقادي

اضرب طريق الخير واسلك مسيره= ولا تلتفت للناس عوجاه واقداه
ولو طال عمرك عارف وش مصيره= ازبن ولي العرش واتعب على رضاه
وأد الفروض الأوله والأخيرة= واضف لهن مخافة الله ورجواه

من كثر ماله ساروا الناس برضاه= ولو كان ناقص قالوا الناس وافي
ومن قل ما بيده ترى الناس تشناه= ولو كان يسقيهم عسل قنط صافي
فالمال كم ساس طمان وعلاه= والفقر كم حطم روابع سنافي
لا شك ما للعبد عن حكم مولاه= من خير وإلا شر وإلا عوافي

قوموا بدين الله ورزوا شعاره= واخشوا نهار فيه تخطيف الأبصار
دنياك مرجعها الفنا والقشاره= لا تامن الدنيا ترى الوقت غدار
لا بد من قبر وحيش جداره= من مات يالمسكين خلي على الدار

لولا الردي ما صار للطيب سمعه= لا شك هذا ضد ذلك يصيري
والناس مثل الماء غدير ومالح= هذا ملاح وذا زلال غديري
والأجواد قربتهم تبيض وجوههم= تنفع ولا من قربهم تأثيري
والأشرار نفعتهم مكافاة شرهم= وإلا ترى قرب اللئيم خطيري
الرجل عقل ومرجله وديانه= بلا شك راعي ها الثلاث ظهيري

من طاول الدمعه تكدر شرابه= وألغت مرارة دمعته كل حالي
وأفنى عنا دنياه زهرة شبابه= لو كان من بين الخلايق مثالي
واللي يبي ياقف لوقته يجابه= ينهد حيله والزمن ما يبالي

إلى بغيت اتحط كلش على البال= غديت صقار بساقه هداده
تغثك الدنيا ولا أدركت به حال= مثل البعير إلى تقلد اشداده

تخير إذا رافقت من الناس عارف= رجل إذا شان الزمان يطيب
رفيق على عسر الليالي ويسرها= كما الزرع في وقت الدهور خصيب
أمين يحفظ السر عن ساير الملا= حفيظ على ما في الضمير قطيب

قصر يذلك لا تقابل مبانيه= خله عسى شامخ طويله هدامي
خله عسى ما صاب أغادير يفنيه= يودع منازله الطويله رجامي
لو زان مدخاله وطالت حواميه= شيد على الخيبه قليل الرحامي
وحي يوريك المذله وتغليه= أنا أشهد إنك ميت القلب عامي
من لا يودك لا توده وترجيه= ارفع مقامك يا عزيز المقامي
ارفع مقامك عن عدوك وتوذيه= ويلحقك من تركة رفيقك ملامي
حق الرفيق وواجبه لا تخليه= يلزمك مثل الوالدين الحشامي
اختر عزيز الجار والحق يعطيه= شبل على هرج يقوله يحامي
ومن قارب الأجرب بالأمراض يعديه= عدواة تسطي اللحم والعظامي
درب السلامه بينات مماشيه= ودرب العطب يرث عليك اللكامي

لا خاب ظني بالرفيق الموالي= ما لي مشاريه على نايد الناس
لعل قصرٍ ما يجيله اظلالي= ينهد من عالي مبانيه للساس
لا صار ما هو مدهل للرجالي= وملجا لمن هو يشتكي الضيم والباس
بحسناك يا منشي حقوق الخيالي= يا خالق أجناسٍ ويا مفني أجناس
تجعل مقره دارس العهد بالي= صحصاح دوٍ دارس ما به أوناس
البوم في تالي هدامه يلالي= جزاك يا قصر الخنا وكر الأدناس
متى تربع دارنا والمفالي= وتخضر فياض عقب ما هيب يباس
نشوف فيها الديدحان متوالي= مثل الرعاف بخصر مدقوق الألعاس

لا تقرب الأجرب بالأمراض يعطبك= يصير جسمك مثل جسمه عليلي
ممشا الخطا من صافي العقل يسلبك= ويصير لك يم الرذيله سبيلي
وعن مارد الأنذال نزه مشاربك= واشرب نظيف لو ورادك طويلي
ولياك تنسى يا ابن الأجواد واجبك= واللي يروم المجد حمله ثقيلي
يا لادمي وإن كان كبرت مصايبك= ازبن على محي البلاد المحيلي
ازبن على رب بعرشه يراقبك= وناجه وبعد العسر يسره جليلي

بلادي وإن جارت عليّ عزيزة= وأهلي وإن ضنوا عليّ كرام