عيسى يقول الحرب للمال نفاد = انشد مسوى السيف قل ليه حانيه
إن كان ما نرويه من دم الأضداد = ودوه بم العرفجيه ترويه

طار الكرى عن موق عيني وفرا = وفزيت من نومي طرا لي طواري
وأبديت من جاش الحشى ما تدرا= وأسهرت من حولي بكثر الهذاري
خط لفاني زاد قلبي بحرا= من شاكي ضيم النيا والعزاري
سر يا قلم واكتب على ما تورا = أزكى سلام لابن عمي مشاري
شيخ على درب الشجاعة مضرا= من لابة يوم الملاقا ضواري
ياما أسهرنا حاكم ما يطرا= واليوم دنيا ضاع فيها افتكاري
أشكي لمن يبكي له الجود طرا= ضراب هامات العدا ما يداري
يا حيف يا خطو الشجاع المضرا = في مصر مملوك لحمر العتاري
من الزاد غاد له سنام وسرا= من الذل شبعان من العز عاري
وش عاد لو تلبس حرير يجرا= وامتوج تاج الذهب بالزراري
دنياك يا ابن العم هذي مغرا= ولا خير في دنيا حلاها مراري
تسقيك حلو ثم تسقيك مرا= ولذاتها بين البرايا عواري
اكفخ بجنحان السعد لا تدرا= فالعمر ما ياقاه كثر المداري
ما في يد المخلوق نفع وضرا= ما قدر الباري على العبد جاري
واسلم وسلم لي على من تورا= واذكر لهم حالي وما كان جاري
إن سايلوا عني فحالي تسرا= وقبقب اشراع العز لو كنت داري
يوم إن كل من خويه تبرا= خليت أنا الأجرب خوي مباري
ورميت عني برقع الذل برا= ولا خير في من لا يدوس المحاري
نعم الصديق إلى سطا ثم جرا= يودع مناعير النشاما حباري
ونزلتها غصب بخير وشرا= وجمعت شمل بالقرايا وقاري
وحصنت نجد عقب ما هي تطرا= مصيونة عن حر لفح المذاري
والشرع فيها قد مشى واستقرا= ويقرأ بنا درس الضحى كل قاري
زال الهوى والغي عنها وفرا= ويقضي بها القاضي بليا مصاري
وما سلت عمن قال لي : لا تزرا= نجد غدت باب بليا سواري
وما سلت عمن قال لي : ما تدرا= حطيت الأجرب لي صديق مباري
ومن أمن الجاني كفا ما تحرا= وتازى حريمه بالقرايا وجاري
وأجهدت في طلب العلى لين قرا= وطاب الكرى مع لابسات الخزاري
ومن غاص غبات البحر جاب درا= ويحمد مصابيح السرى كل ساري
وأنا أحمد اللي جاب لي ما أتحرا= وأذهب غبار الذل عني وطاري
والعمر ما يزداد مثقال ذرا= عمر الفتى والرزق في كف باري
وصلاة ربي عد ما خط قرا= على النبي ما طاف بالبيت عاري

إن سايلوا عنـي فحالـي تسـرا=قبقب شراع العز لو كنـت داري
يوم إن كـل مـن عميلـه تبـرا=حطيت ( الأجرب ) لي عميل مباري
نعم الرفيق إلى سطـا ثـم جـرا=يودع مناعير النشامـا حبـاري
رميت عنـي برقـع الـذل بـرا=ولا خير فيمن لا يدوس المحـاري
يبقى الفخر وأنا بقبـري معـرا=وأفعال تركي مثل شمس النهاري