ياصاحــبـي كـنّـا ونبقــى حــلاحـــيـل =
=للمجــد نرقـى فــوق قـــمّــة جــبلهـا
افـهـم عـــدل لاتـأول الوضــع تأويــل =
=والكلمـه العـوجا مـن المـزح شـلـهـا
يومنهـا بالسـيف والرمـح والخــيـل =
=نملك مـزاييـن الأبـل مــع فـحـــلـهــا
نغير في وسط الضحى واوسط الليل =
=ونجيبها غصبٍ عن خـشـوم أهـلهـا
ويـلان حــنـا فـعـلنـا لـــه دوالــيـل =
=نردم عـلـى كـبـد المعـادي عـللــها
وان زغردت ام الرموش المظاليـل =
=وقامت تناظـر كـيـف ردّة فـعــلهـا
نشوش من زود السطر كالمهابيـل =
=والمـوت احـلا عـندنـا مـن عسلهــا
مـتوارثين المجـد جيـلٍ ورى جــيـل =
=فـتخــيـن الأيـدي كاسـبينـن نفـلـهـا
ويلان حنا أهل الكـرم والمعـامـيـل =
=عــاداتـنـا ماغـــيّـرتـهـا فــــللــهــا
لضيوفنا نذبح من السمّــن الحـيـل =
=وقصـيرنـا مــاراح يشـكـي مـللــها
والحـمـد لله يـوم صــارت تساهيـل =
=جاها السديد بديـن ربـي شمـلهــا
يكفي يمثلنا مـن النفـس حلحــيـل =
=مشعـل أخـو نـوره بجـوده كفلهـا
مادام صارت بالذهـب والتهــاويـل =
=واحيت علينـا عنصريـة جـهـلهــا
ماعـاد نبغى من وراهـا محـاصـيـل =
=وقـلـوبنـا للخـيـر ربـي عــــدلـهـا
نعطي الفقير اللي شكى العوز والويل =
=وام اليتامــا بذلـنـا قـــد وصـلــهـا
وضعيفنا نرفى خماله عـن المــيـل =
=اخير من دفـع الفلـوس بجـمــلهـا
ونذلل ظـروف المساجيـن تذلــيـل =
=ونعتـق رقـابٍ دافـع الله أجــلـهــا
ياصاحبي نقدر وفينـا لهـا حــيـل =
=ونملـك ملاييـن الفلـوس وهـللـها
واذا رغـبنـا بالليالـي المـقـابـيــل =
=تشوف ويلان السعـد وش عـملهـا
قـلته وانـا مـاودّي القــال والقـــيـل =
=حسبي على اللي حيييل كبدي دبلها