مـا دمــت تنـشـد يا رفيقي عن الحال=مالي على كتمانها عنك حيله
الصبر عن بوح الأحاسيس قتًال =والبوح في بعض المواقف فشيله
لو كل ما يطري على البال ينقال =ما كان شفت إن الثقيله ثقيله
أبطيت أكافح ضيقة البال بالبال=وأدفع بلا هاجوسها كل ليله
لين أقبلت مثل السحابه بهمال =تشفي غليل اللي تزايد غليـله
طاحت ولاْوفق من حناياك منزال =وأبطلبك يا بدر ( تكمى ) المخيله
إن قيل ترعد قلهم : صوت زلزال=وإن قيل تبرق شف لها أدناة حيله
مابي تناقلها هل القيل والقال =وتصير من بعد القصيره طويله
يا بدر ماني عال لو صحتي عال=شفني من الصدمات نفسي عليله
أشيل حملٍ لو يشيلنه جبال =الله وأمانه غير تصبح نثيله
أرمي من هموم الزمن وأسحب أدبال=وأنزل عن ( الجوكر ) وغيري يشيله
من كثر ما شفت بحياتي من أنذال =بديت أشك إن النذاله فضيله
ما طاح من عيني رجل طاحوا رجال =ورجال ( يابن حنيف ) ما هي قليله
أقرب من اللي قالهم ضمن ما قال :=راكان بن حثلين راعي الجزيله
( هذا ولد عمٍ، وهذا ولد خال=وهذا رفيقٍ مالقينا بديله )
سبحان من هو يا بدر غيّر الحال =وحط الجفا بين الخليل وخليله
هذا الزمن يبغاله لسان دلاّل =من يستحي هالوقت وا عزتي له
وقتٍ به ( الراعي ) غدى راعي دلال=كلٍ على طاريه ينفض شليله
ومن كان ساسه للردى مضرب أمثال =اليوم يحسب من كبار القبيله
المال يابن حنيف ملعون أبو المال =ذل العزيز وعز ناسٍ ذليله