من يعذل الهاف جعلة فدوة لة= جعل يفدنة غنادير البناتي
لا نهمت الهاف جاك الهاف كلة= كنه يشرب من غراش المسكراتي

يا راكب زينة المرواح = مكينته وارد العامي
سواقها مبارك البطاح = ومعاونه صالح النامي
إلى مشوا خاطري مرتاح = لا شالوا الفن ما أنامي
العصر من قصر ابن بطاح = والصبح من بين الأعلامي

يا احول يا فهيد أبو صدام = جن الحناتر وخلنه
الناس ناموا وهو ما نام = يلعي كما تلعي الشنه
الله يجازيك يالأيام= من ضحكنه يبكنه

وأركبونا حناتير مجده = صبح ثالث وحنا بأرض حايل
وشرهونا الفشك ما أحصوا بعده= والألماني عطونها بدايل

أنا هواي وشف بالي يا أخو نوف = سودٍ وبرها زايدٍ بالسوادي
لا جيتها صدري من الهم مكتوف = كني بليلٍ من ليال العيادي
خصً إليا جاء للهفاهيف هفهوف = وقام السويبع للمنادي ينادي
زهابهم فوق الحناتير ملفوف= وقامو يبارون الدبش يوم قادي
أناسة (ن) ما ينتوصف لها أوصوف= يطرب لها شرس الرجال الحيادي

عسى الحمر ما يجيه اخلاف = عسى له الدرب ينفاجي
عساه ما يطلب الإسعاف = دايم تساهيل وافرجي
القير والدزق والحذاف = ما هزهزه كل بطناجي
مع المطبات ما ينشاف = تقل يتغنج تغناجي

يا راكب فوق عنترناش = حس الحرابي ببوديه
من طلعته مرفع بقراش = ما مرنوه العليميه

يا راكب كور ما تدلي = تطا على العشب ما تذوقه
مركوبها كن به زلي = وتشره على الطير بلحوقه
سلم إلى جيت إلى خلي = وأنا بحظه عن البوقه

وين أنت يا ناشد عنا = ترى الوعد راس تنوره
قل له ترانا تمدنا = وكل يولع بدافوره

يا عيال ياللي تبون الجمس = لا تشترون البرازيلي

إلى بغى بنزين ركب مواصير = واللي تبيه النار ركب بواجي
نبا عليه نسخر البعد تسخير = تسخير شيهان لفرخ الزراجي

الموازنه ما تحتمل غير لوريل = اللي تريح خاطري لا نصيته
هي سرعة وإلا ديكور وتجميل = من شافها طابت ليالي مبيته
تجعل طريقي كل ما احتاج تطويل = في أيسر الأوقات لا من بغيته
وانحلت من حال الشقى للتساهيل = والهم من راحة ضميري طويته
أنا أشهد إن البيض برقى المجاميل = ما تنحرج لو بعتها أو شريته
يا سايق النيسان عليك تهليل = أنا أشهد إن الكيف والله لقيته
لا تاوي للبنزين وبالقير تبديل = حتى تجاوز كل رمل وطيته
لوريل ما سبب بالبال تحويل = إلا لأن الحمر شاعن بصيته
ولوريل هي منوتي يوم تجويل = فوق الطعوس النايفه والكميته
وماني بشعري قاصد له بتكميل = لو كان كذب يا عرب ما حكيته

حن قلبي حن ماك ٍ على سمر العجل= عشق السواق والدرب ممسوك ٍوراه
إن عطا مع طلعة ٍ عشقوا له بالدبل= وإن تسهل ريّحة لين ياصل منتهاه
ما بشفي لا دريول ولا ريس عمل= شفي اللي كل ما شاف براق ٍرعاه
قاطنين ٍ فوق عد ٍ على جاله عبل= طيّب ٍللبل وراعيه ما يقطع ظماه
ونتي ونة خلوج ٍ ولدها ما جدل= تشرف المرقاب للذود وتعوّد وراه

يا حن قلبي حن ماك ٍ مع الطلعات= لا عشقه بالعايدي والدبل جره
جرمه ثقيل وحملوا فوقه البيبات= ويدعس عليه إبنزينه ولاسره
أنا دمع عيني بالدقايق وبالساعات= ولا هي على فرقا المحبين مستره
هواجيس قلبي كل ما أقول راحت جات= تعوّد علي باليوم خمسة عشر مره

يا أهل الونيت اللي يبا مشتل البيب= ما دق صدره بالخطوط الغزيره
يوم يتخثع في محير الأداعــــــــيب = يشدي تخثع جادل في حــــريره
لا تجربونه ما يبا الفرت تجريـــب= قد جربه بالبيت الأبــيض خبيره

يا راكب من فوق زين المداقـــــــــــير= قطع الحديد اللي عريض مقاسـه
عليه من ديوان زايد فواتــــــــــــــــير= مرهق سلاطين الدول بالسياسـه
اللي بحكمه طور الشرق تطويـــــــــر= وابن الخليج النيم طير نعاســـــه
ما عارضوه الشرطة اللي على السير= حيث إن رقمه دارسينه دراســـــــــه
يوم ابتدى اللازم كفخ كفخة الطيــــــــر= وأقفى يبا اللي منقع الطيب ساسه

يا أهل الونيت اللي على مدقره ميم= نقل الرياض الخط ما توصلونه
صناعته مخطين ملة إبراهـــــــيم= حمران روم لونهم مثل لونـــــه
ما رهموا له بالكراجات ترهــــيم= ولا طلعوا كبريتره ينفخونـــــــه
والله لو أمسك طارته يالمغانيــم= ما عاد أقلد دولة يصنعـــونـــــــه

الله على اللي يوم يفتل عمـــــــــــــوده= يطلع ثرى أرض بعد القيض ماها
......................................=خطو المحالة مفرد من رشاها
ليا أونس ثقيل الترس يرسي عضوده= شيهانة ترخي المتون لعشـــاها
عده على اللي ما يدرهم قعـــــــــــوده= من صار زيزوم المشاكل حماهـــا

يوم جرى لي بالبسيطا تواعيــــــــــس= بالسهلة اللي مثل لبة منيـــــرة
عيا حلال القوم لا يشتغل ريـــــــس= والماء خلص والموت قرب نذيــــرة
ماني وأنا بندر بهيس ولد هيـــــــــــس= هيس يدنع عند حرمة قصيــــرة
إلى بغيت أجلس ترى لي مجاليـــس= وإلى بغيت أنهج دروبي عسيــــرة

من فوق فرت يوم يرخي المتوني= جول القطا إلي ورد عقب مرواس

راكب اللي يوم طب من النفــــــــودي= كن صلفات الهبايب عج ويله
صوت سيره يوم غنى بالعمودي= صوت ذيب وارد راس الطويلة

يا منير دوك الفرت واخذ الفواتير = افحص عليه وادخله بالكراجي
اللي يبا بنزين ركب مواســـــــــير= واللي تبيه النار ركب بواجـــي

إلى بغيت أجلس ترى لي مجاليس=وإلى بغيت أنهج دروبي عسيرة

راع البلد يا ميت القلب مسجون=اضرب تهاتيه الخلاء تستفيدي

ولي عجوز من ورى شط بغداد =سمت على الطير الفلاحي ولدها
تبيه يطلع مثل زايد ولا فاد=وما كل من هاز الطويلة صعدها