تعطر يا ثرى الحد الجنوبي واذكر السبعان=إليا ثار العجاج وقيل يا نطاحة الهيه
تعطر بالدمي الطاهره بالمسك والريحان=دميً ما خلطها غير حبك يالسعوديه
تعطر من هل الغلباء تعطر يا جبل دخان=تعطر وانشد المصمك وتاريخه وماضيّه
يبا يعطيك علم أسلافهم في ساحة الميدان=علشان تعرف وشلون يعطى القوس باريّه
محمد والفخر ماهوب توه في بني عزوان=مسجل فى سنام المجد والتاريخ راويّه
على إبراهيم كاشف يا محمد داسوا الجدان=وعلى الحوثي يدوسون العيال ونارهم حيه
محمد والمنايا يوم حانت حضّر الديان=وقمت تعانقه وتقول له يا حي طاريّه
لقاك الفارس اللي ما تهزه صولة الفرسان=ولقاك المؤمن اللي يعتزي نخوه وغاريّه
على حد الوطن يومه نخاك وثور البركان=ونادا يا أهل التوحيد خياله ورجليّه
وقفت بموقف العزه وقفت بموقف الإيمان=نبلغك السلام من الوطن شرقه وغربيّه
ومن حد الشمال ونجد الأنجد لا طرف جازان=عبارات الفخر والمجد مربوعه ومثنيه
يزفونك إلى جنات عدن وجيرة الرحمان=وأنا عبرت فخر وعز ما حطيت مرثيّه

مبدأ الشــعر في مـوقفـي حمــد الله = ثــــمٍ صــلاة الله عــلى رســـولـــه
ومبـــدأ الرجــال بهالحيــاه الصعبـه = حــكــمه عظيـمه مـن قبــل مقيوله
أمـــا حيــاةٍ تســــعــد اللـي حـــولك = وإلا عســى مـــوتٍ على أصـــوله
واللــي جـمعهـا بالحيــاه ومــــوتـــه = نفخر به الله يحسنه بــــقبــوله
فـــي فــتـنـــة الحـــوثيّــه الخـــوّانه = اللــي عقــول أجســادهم مغســوله
قصــــة بطــلنا بالــزمــان تخــلّد = نـــومـاس لرجــال البــلد وزحوله
يــوم انسأل دون الوطــن وش ودك ؟ = جاوب وروحــــه بالسطـر مجبوله
قـــال الشهــاده مــع نصــر يلحقهـا = وآنــا فـــدا لله ثـــم للـــدولــــه
وحــرّك إلى الجبهــه وحــثّ أقــدامه = ثابت ومتنه مــا درى بحموله
وأي إتصـــــال يجيـــه من أحبابـــه = رده بجملـــه ساميــه مسؤوله
تطمنــــوا ما أبغـى إتصــالٍ آخـــر = نفسي ترى بأرض الوطن مشغوله
مقــــدام والمـــوقــف يبي أمثالـه= لا رحم أبــو شخصٍ تِكـــل رجــوله
ومـن بعــــد جولــه ظافــــره حققها= مــع كــم صــولـه قبلها مدبــولــه
مــا أمــدى يحـــط أقـــدامـه يريحها = إلا المنـــادي نبرتـــه تسمـــو له
نحتـــاج كـــم شخــص لمهمه أخرى = وبيّـــن خطـرها فـي ثنايا قـوله
قــــام وتـنّحــرها وقــــال أبشـــر بي= مــا جيت أدوّر راحــــه وقـيلـولـه
ثــم قـــاد لـــه فـــرقـــه من البواسل = وبــه فــــرقتـــينٍ مثلـــها مفتوله
يـــم الخصـــم كـــلٍ خــذا له مــوقـع = وغــاروا عليه بخطـــةٍ مقــفــوله
مـــــن فـــوق ضلــعٍ عـاليٍ مشرافه = الــدود اسمــه والخطر مدلوله
وأبلـــوا بلاءٍ نــادرٍ مــن نوعــه = مــن سطوته عين العدو مذهولــه
أنهـــوا مهمتهم عـــلى خطتــهم = وقبــل التحرك أوعـــز لمن حوله
يـاالله على المـركـــز وأنا آخركم= عـيّـوا وأصّر بكلمته وأصغوا له
جاته رصاصه مــن مشى يسندهم = روحـــه غــدت من بعـدها مقتوله
نصـــر وشهـــاده قـــالها وأحـرزها = وكـــلٍ على النيّـــه تجيك فعوله
محمـــد بـن عبــدالله بـــن خزيّــــم = أنــا أشهــــد إنــه من رجال الطوله
عيــــال عبـــدالله وذي عــــادتـهم = دون الوطـــن كــــلٍ وله مفعـوله
الله يــرحــــم شــــايــبٍ ربّـــــاهـــــم = عـــلى الوصـل والـدين والـرجـوله
واللي جمعـــها بالحيــــاه ومــــــوته = نفخــر به الله يحــسنه بقبـــولــه
سيرتـــه عطـــره فـي حـياتــه كـانت = وريحتـــه مســك وجثتـــه مقتــوله
والخاتمه في موقــــفي شكر الله = وأتـــم تسليـــم ٍ عــــلى رســـــولـه

هـو مـن لهـا لا دخنـت بارودهـا يمدهـا=هو من لهـا إلـى تعـرض حدهـا مقرودهـا
هو مـن لهـا لا شرعـت أنيابهـا يضدهـا=هو من لها إلى انعمـى عدوهـا عـن كودهـا
هو من لها لا ظـن موقدهـا بحربـه جندهـا=أحجار شطرنـج (ن) يرقـع فيلهـا بجنودهـا
الحرب يا موقد فتيـل الحـرب اعـرف ردهـا=من عند أبو متعـب عقيدتهـا يعقـد ابنودهـا
هذا الوطن ما نرخصه من دون حـده أسدهـا=ثني الركب في رميحها دخانهـا فـي دودهـا
هذا الوطن يا خادعه ماء خضرة (ن) في سندها=هـذا وطـن بقيـة أيـام وليالـي هـودهـا
هذا الوطن هو الوطن قبل (ن) تبنّـى هندهـا=هذا وطن أحمـد نبـي (ن) للهدى محمودهـا
يا مملكتنا دونـك عهـود (ن) قديمـه أزدهـا=يوم (ن) تبايع بايعت بقلـوب أرض حيودهـا
من دونها لبوا رجال (ن) من تبـوك ونجدهـا=من شرقها لي غربها سهـل وجبـل نفودهـا
جيزانهـا نجرانهـا أحساءهـا مـا صـدهـا=وقفت مواقيف الشرف تزف شـروى فهودهـا
دون الديار الطاهره شلف (ن) ويبـرق حدهـا=تقصف قلوب (ن) تحتسي نخب الغدر بكبودهـا
هو من لها يوم اشتهى الزنديق جـرة غمدهـا=الدين دونـه وقفـة (ن) شهيدهـا بسجودهـا
ريـس حرسنـا عاهـل للمملـكـه يـودهـا=وحدودهـا شريـان دمـه وارثـه بشهودهـا
هو قلبها هو سورها هو ابنهـا هـو عودهـا=قايـد حشـود للوفـاء زيزومهـا يقـودهـا
ما قفلت بيبانهـا يـوم أنعمـت فـي رغدهـا=وما سكرت بيبانهـا فـي يـوم قـل انقـوده
يلطم بسيف الحق غر (ن) جاهل (ن) في حدها=يظن حربه مدة (ن) ثـم تنقضـي اقصودهـا
غشاوة (ن) بصيرته والعيـن جاهـا رمدهـا=يا قربها من ساعـة بـي تاصفـه شرودهـا
قد قلتها وأنا أغتذي حب الوطن فـي مهدهـا=من لابة في مهودها نسجت وصـوف لحودهـا
الكل بايع يـا أبـو متعـب ثـم ثنّـى شدّهـا=بيعة عهد عنـد الشريعـه وصفهـا وفنودهـا
هذا الوطن دونه عهود (ن) سنها جار أحدهـا=هذا الوطن دونه رجال (ن) بالشرف صمودهـا
هذا الوطن دونه رجال (ن) دثرت فـي مجدهـا=ورسّمت حد الوطن بزاكـي حقـوق اوعودهـا