السلام عليكم ورحمة الله وبركاته
صباح/مساء الخير إخوتى وأخواتى الكبار فى برنامج ( حبايبنا الصغار)
وأهلا وسهلا بحبات قلبى الصغار
ازيكم أخباركم ايه .....يا رب كل حبايبى الصغيرين يكونوا كويسين ومبسوطين
أنا بقى اسمى العليــاء بس صحابى وحبايبى اللى بحبهم اوى اوى بيقولولى يا ((لــــــيله)) وطبعا انتوا هما صحابى وحبايبى
انا بقى جاية النهاردة و عندى حواديت كتير كتير اوى
وهاحكيها كلها بإذن الله وفى كل مرة أقابلكم فيها هاحكيلكم حدوتة جديدة نعرف مع بعض منها حاجة جديدة ونتعلم عادة مفيدة نبقى بيها أجمل
حدوتة النهاردة يا حلوين بتتكلم عن اتنين من صحابنا اللى دايما معانا ومش بيسيبونا الا وقت قليل جداااا
عرفتوا هما مين
" " "
" "
"
صح...............وبرافو عليكم
هما فعلا
القلم والممحاة
طبعا كلنا عارفين ايه هو القلم أما بقى الممحاة دى فدى اللى احنا بنقول عليها الممسحة أو الاستيكة ودى اللى بنمسح بيها الحاجات اللى بنكتبها بالقلم الرصاص لو غلطنا فيها أو حبينا نغيرها
تعالوا معايا نحكى الحدوتة
كان فى ولد صغير اسمه سامح .... وكان عنده شنطة جميلة أوى بيشيل فيها الكتب بتاعته ومقلمته اللى ماما جابتهاله لما راح المدرسة .
المقلمة دى كان فيها ممحاة صغيرة , وقلم رصاص جميل...
قالت الممحاة:- ازيك يا صاحبى؟؟
فرد عليها القلم وهو عصبى ومتنرفز وقالها:- أنا مش صاحبك...ابعدى
استغربت الممحاة اوى وقالت:- ليه بتقول كدا؟؟
فرد القلم : علشان أنا باكرهك ومش باحبك.
زعلت الممحاة وقالت وهى حزينة:- وبتكرهنى ليه
فقال القلم: علشان انتى بتمسحى اللى أنا باكتبه
فقالت الممحاة بسرعة: أنا مش بامسح الا الحاجات الغلط بس
فاتعصب القلم اوى وزعق فيها : وانتى مالك انتى تمسحيها ليه
فقالت الممحاة بكل هدوء: انا ممحاة , ده عملى.
فقال القلم: ده مش عمل اصلا.
بصتله الممحاة وقالت له: عملى نافع , زى عملك بالضبط.
ولكن القلم اتنرفز أكتر وقال لها: انتى غلطانة ومغرورة .
فاستغربت الممحاة وقالت: ليه؟!. فرد عليها القلم:علشان اللى بيكتب أحسن من اللى بيمسح
فقالت الممحاة: إزالةُ الخطأ تعادل كتابةَ الصواب أن تمسح الخطأ شئ جميل زى كتابة الصح
فكر القلم شوية وبعدين رفع رأسه، وقال:فعلا يا صاحبتى !
فرحت الممحاة وقالت له: ودلوقتى لسه بتكرهنى . فجاوبها القلم بعد ما حس
بالندم: مش هاكره أبدا اللى بتمسح أخطائى. فردت الممحاة: وأنا مش هامسح أبدا الحاجة الصح.
قال القلم: بس أنا شايف انك كل يوم تصغرى شوية شوية.
فأجابت الممحاة: علشان كل ما بمسح حاجة غلط أنا بضحى بحته من جسمى :
فقال القلم وهو زعلان: وأنا كمان حاسس انى اقصر من زمان .
قالت الممحاة تواسيه: ما تزعلش ما إحنا ما نقدرش نساعد الآخرين من غير ما نضحى علشان خاطرهم
قال القلم وهو سعيد: انتى عظيمة أوى يا ممحاة وكلامك حلو وأنا بحبك أوى .
فرحت الممحاة، وفرح القلم، وعاشوا مع بعض صحاب وما افترقوش ابدااااا
شايفين يا حبايبى أد ايه احنا الصداقة شئ جميل
رغم ان القلم والممحاة حاجتين عكس بعض.... ده بيكتب وهى بتمحى إلا إنه بالتفاهم والحب قدروا يكونوا اصحاب
وشايفين كمان أد ايه الممحاة كانت سعيدة انه بتقدر تساعد الاطفال الصغيرين انهم يمسحوا الاخطاء اللى بيكتبوها وأد ايه القلم كان فرحان ان الاطفال بيكتبوا بيه الحاجات اللى بيتعلموها فى المدرسة رغم ان ده ممكن يضرهم
أحيانا بنقى فرحانين وسعداء لما بنساعد حد غيرنا أكتر من لو أخدنا كل حاجة .
يا رب تكون حدوتة النهاردة عجبتكم واستفدتم منها حاجة جديدة
وقبل ما امشى أحب أقولكم انى فى كل حلقة هاسيب معاكم وردة لغاية الحلقة اللى جاية ووردة النهاردة هى
الوردة الأولى
نغسل أسناننا كل يوم الصبح أول ما نصحى وبالليل قبل ما ننام علشان تكون اسناننا بيضاء وقوية وضحكتنا تكون جميلة
هتوحشونى يا حبايبى لغاية ما اشوفكم الحلقة اللى جاية .... خلوا بالكم من نفسكم وما تنسوش تاخدوا بالكم من الوردة اللى انا سايباها معاكم
حبيبتكم
لــــــيله
« آخـــر مشاركات الأنساب »
10-09-10, 04:27 PM
.gif){kind=icon}
حلقات حبايبنا الصغار .... متجدد 
.gif "Smile (9)")
العرض العادي
