لمه لمه يا راسي الغالي وأنا أعدّك لبيب؟
يضحك عليك الشيب ياراسي وتحمل مشعَله
يبدأ يدغدغ جانبيّ ابلا رقيب ولاحسيب
ويبتسم ويقول هذا العز..هذي المرجله
وينتشر ما دمت له ياعزوة الروض الخصيب
مدري متى سمّى ولا أظنه بدأ بالبسمله
لاهو يخاف من الصياح ولا يحن من النحيب
ولايبالي تمدحه والا تكيل الشتم له
لاهو عدوّ ٍ تعرفه ولا تظن إنه حبيب
لاهو حميم ٍ تعذله ولا خصيم ٍ تقتله
يقول أنا مثل الصبا يقول أنا مثل الحليب
يقول أنا كالزهر الابيض غايتي ودّ وصله
وأنا اعرف إن الشوك الأبيض يجرح الكف الرطيب
بعض الزهور البيض لو جادت تجود بحنضله
الشيب ماخلا ردي والشيب ماخلا عريب
أقول ساع ٍ ما أظلمه وأقول ساع ٍ ما أعدله
الشيب ضيف ٍ لو نزل لاهو يمل ولا يغيب
وإن حل في راس الكريم يزيد حتى يشمله
وكل ما زاد البياض أخشى سويعات المغيب
ترى بياض السنبله يعني حصاد السنبله
الشيب ماهو عيب لكن مافعل بي الشيب عيب
لاهو يطمّني ولو طمّنت ظبي ٍ جفّله
ولو صبغت الشيب خانتني جذوعه من قريب
وأصبحت في عين الضبى غشّاش والدهر أهمله
ما أبغا الفتاه اتقول واعمّاه يالشيخ العجيب
صوتك يقول إنك شباب وشيب راسك يخذله
ما ابغا يقولون أنت شايبنا ومحزمنا القطيب
مدح ٍ يكدّر خاطري ما سرّه إلا علعله
من يجتهد يا راسي الغالي يجد حظ ونصيب
وأنا اجتهدت وشيبك يهلهل كياني هلهله
ما ابغاك تُحبَس في شماغي كنك الكنز المريب
اذا حجبته معضله واذا كشفته معضله
الناس تثني عالعنب ولا يذمّون الزبيب
لكنّ يبقى للعنب بأول قطافه منزله
أبكي على حالي ومن يبكي على حاله مُصيب
وأضحك على حالي ومن يضحك على حاله دَلَهْ
يسقي زمان ٍ كنت أنا فيه المخاطب والخطيب
أقطف من الزهر أجمله وأنظم من الشعر أغزله
واليوم أنا أعد الخُطا وأخاف من عين الرقيب
ولو نظمت الشعر أخاف أخاف وإن قلت أجزله
قد كان لي جسم ٍ نحيل وكان لي صدر ٍ رحيب
أسري ولو غاب القمر والهم أبد مالي وله
واليوم أقول إني صحيح وماني ابعد م الطبيب
وأقول أنا مستانس وصدري حراك وجلجله
كم كنت أغني ربما يطرب لصوتي العندليب
أو ربما أغشى البحر ما أخاف البلل والبلبله
وأجعل من القاسي مذاب ولايذوّبني مُذيب
ومنهجي في السابعه والثامنه في الزلزله
ولو نهاري غرّني أمسيت في ليلي منيب
ولو زماني ضرّني كسّرت بيدي معوله
ولا يوقفني جبل ولا يهرول بي كثيب
العاقل إللي ما يقف ولا يهرول هروله
أحد ٍ مشى فيها مرح وأحد ٍ يدبّ إبها دبيب
وأنا قصدت المشي يكفلني زماني وأكفله
واليوم غيّرني الزمن كأني على نفسي غريب
لاني قويت أمضي معه ولا قويت أفرمله
آقف وأنا متماسك ٍ لاكاني اودي واجيب
الدهر وإن ما طيّح الشامخ تراه ايململه
حتى إختراعات الزمن أشوفها لغز ٍ عصيب
من فاته قطار الزمان أصبح عدو ومايجهله
ياراسي الغالي تشيب اليوم والا ماتشيب
إللي يشوف أتلى الزمان يقول يازين أوله
« آخـــر مشاركات الأنساب »
05-08-11, 10:41 PM
الشاعر الشريف عبدالله بن محمد الحسني 
العرض العادي
